الإحصاء بطعم الفكاهة

طبعا معظمنا جايلة فوبيا من كلمة "إحصاء" بندرسها كتير، كتير قوي، ابتدائي واعدادي وثانوي وجامعة (ابتدائي دي مش مكتوبة غلطة) بص على الرسم البياني في كراسات الولاد الصغيرين ده إحصاء.

انا بقة حاصدمك النهاردة، حقولك ان الإحصاء دي حاجة لذيذة قوي زي ال "تشيز كيك" كده 😊  

فيه حاجة اسمها الإحصاء وحاجة اسمها العد. العد معناه انك تعد واحد اتنين تلاتة، إيه الهيافة دي 😊 يعني تعد السيارات اللي ماشية في الشارع ده عد، تعد المصابين بمرض معين ده عد.

الإحصاء بقة هي العد مع تسجيل العدد، بس كده ؟ هي الإحصاء كده وبس؟ ايوه هي كده وبس. انك بتسجل الأعداد. يعني الإحصاء هي العد مع وجود الذاكرة. فيه آيه قرآنية بتقول "فينبئهم بما عملوا احصاه الله ونسوه" أي ان الإحصاء يتوجب وجود ذاكرة.

وفي آية اخرى "لقد احصاهم وعدهم عدا" تشير إلى الإحصاء والعد، فالله سبحانه وتعالى يعرف عدد الناس اللي اتولدت من يوم سيدنا آدم الى قيام الساعة (العد). وعارف توزيعهم على الزمن، يعني أيام سيدنا آدم كان فيه كام واحد عايش وايام سيدنا نوح كام واحد كان عايش وسنة 2019 كام واحد عايش وهكذا (الإحصاء)

امال ايه الانحراف المعياري والاحتمالات والعينات والكلام الدسم ده كله؟

، لما بتسجل اعداد لفترة طويلة بينتج عنها ارقام كتير، فبيكون عندك اتجاهين عامين، تلخيص الارقام أو اخذ عينها منها. ممكن تلخص الأرقام دي كلها بأنك تعبر عنها برقمين او تلاته أو برسمة بسيطة. أو تاخد عينه من البيانات تعبر عن باقي البيانات.

دخلنا في التقيل،،، شربه كوارع 😊

أولا: تلخيص البيانات مهم، يعني مثلا ممكن تقول لي متوسط الأرقام وانحرافها المعياري (دول رقمين محسوبين من البيانات) افهم على طول شكل البيانات دي ايه. يعني لو فرضنا ان البيانات دي هي سطح البحر. لما يكون فيه موج عالى (ارقام مرتفعه ومنخفضه) بيكون الانحراف المعياري عالي. ولما يكون البحر ساكن (الأرقام كلها قريبة من بعضها) بيكون الانحراف المعياري منخفض.

ببساطة لو عندي اعداد كثيرة جدا ، مش لازم ابص عليها كلها، ممكن بس اشوف الانحراف المعياري والمتوسط عشان اعرف شكل البيانات، بتوع الإحصاء بيسموه (توزيع البيانات)

الناس بقة اللي ما بتحبش الأرقام، ممكن تتلخصلها الأرقام الكثيرة دي في رسمة بيانيه. وده فرع من فروع علم الإحصاء.

طيب، ايه حكاية الاحتمالات؟ كده حدوخ وببقى عايز اريح شوية بعد الاكل الدسم 😊،

الإحصاء تستخدم في التوقع، يعني ممكن من خلال الأرقام اللي سجلتها الأيام اللي فاتت، أخمن ايه اللي ممكن يحصل بكرة. انت حتنجم بقة 😊 لا مفيش تنجيم ولا حاجة

لو قلتلك عدد السيارات اللي مرت من الشارع اللي قدامك النهاردة كام حتقول رقم، وبكرة كام، وبعده وبعده، سجلت الأرقام دي وعملت ("إحصاء") للسيارات، تمام، لو جيت في يوم وقلتلك انت متوقع بكرة تمر كام سيارة من الشارع؟ حتقول اكيد ابص على الأرقام اللي فاتت، اشوف امبارح وأول امبارح وأول اول، كام سيارة مرت، بعدها اقدر اخمن عدد السيارات اللي حتمر بكرة في الشارع.

بس هل انت متأكد من الرقم ؟ لا ، "قل لا يعلم من في السموات والأرض الغيب إلا الله" يبقى تقدر تقول ب ("احتمال") قد ايه. ومن هنا جات دراسة الاحتمالات، والربط بين الإحصاء والاحتمالات.

ثانيا: اختيار العينة، الأرقام كتير وانا معنديش مقدره ادرسها كلها، ازاي حشوف نسبة البطالة بإني امر على كل بيت واشوف فيه كام عاطل؟ مستحيل. ممكن اخد عينة من كل مدينة واخمن برضة بـ ("احتمال") معين النسبة الحقيقية للبطالة. بس العينة ممكن تكون منصفة؟ ايوه طبعا. شوف كام واحد نزل الانتخابات في مصر من اصل 100 مليون؟ وهي دي العينة من الناس اللي بتقرر مصير البلد، بدأت تتكلم في السياسة وحتودينا في داهية 😊

خلاص انا سكت اهو، بس يا رب تكون المعلومة وصلت..... 😊

محاولة لتبسيط مادة الإحصاء لغير المتخصصين

تقبلوها من اخوكم

د أسامة حسام الدين

متخصص في علوم الحاسبات